Woi Chyai IDPs lawu tsang jawng jawngma, kanu kawa, sara ni a hkrumza hpawng hte ningtawn jawngma kumhpa shagrau hpawng galaw
2020-2021 ning hpaji ladaw Woi Chyai IDPs lawu tsang jawng nambat langai lang na jawngma, kanu kawa, sara ni a hkrumra zuphpawng hte ningtawn jawngma kumhpa shagrau sha-a hpawng hpe Laiza Woi Chyai IDPs lawu tsang jawng kaw November shata 12 ya jahpawt hkying 9:00am aten hta galaw la lu sai re.
2019-2020 hpaji ladaw hta madang shang ai jawngma ni hpe kumhpa shagrau ai hte sharin ginhpan dawn jan hkra sharin achyin ya ai sharin saranum ni hpe mung, masat masa kumhpa shagrau jaw ai rai nna, hpawng hta Muklum Hpaji Du Saranum Kaba Lagang Ja Bu kaw nna mung hpaji jaw mungga shaga ai re.
Hpawng lamang hpe galaw ai marang e jawngma kanu kawa ni mung, myit lawm hkum lawm hte jawng hpe rawt jat galu kaba wa hkra madi shadaw wa na hpe myit mada ai lam, Woi Chyai Hpyen yen lawu tsang jawng up Saranum Kaba Marau Pri Seng tsun ai.
Jawngma, kanu kawa, sara ni a hkrumra hpawng hpe laning mi hta 2 lang galaw ai rai nna, COVID-19 aten ladaw re majaw, hkrumra hpawng hpe November shata 12-13, 2 ya galaw na re lam, ya aten Woi Chyai hpyen yen lawu tsang jawng hta KG kaw na tsang 4 du hkra laika hpaji sharin hkam la nga ai jawngma yawng marai 237 hte sharin sara/num ni marai 26 nga ai lam chye lu ai.
