World Environment Day masat masa hku nna Laiza makau grupyin hta hpun hkai
Mungkan makau grupyin masat nhtoi (World Environment Day) hta Laiza Ginwang Uphkang Rung ni woi awn nhtawm, June shata praw 5 ya jahpawt hkying 7:30am aten kaw nna Mai Sak Pa mare lam kaba makau mayan hta hpun hkai shatut ai lam galaw ai re.
Mungkan makau grupyin masat nhtoi (World Environment Day) hta shaning shagu hpun hkai na masing hpe galaw na matu myit da ai hte hpun hkai bungli masing hta tatut hkrang shapraw galaw sa wa ai lam hpe Nam Maling hte Grupyin Gawnhkang Magam Dap Amu Madu Du Kaba, Kumhtat Brang Seng tsun ai.
“World Environment Day (Mungkan makau grupyin masat nhtoi) masat dingsat hpe madi shadaw ai lam, hpang na du sa na ban prat shu mashi shu masha ni a matu akyu nga ai bungli langai byin tai wa lu na matu, aten galu mai sung lang ai maling hpun, shing nip hpun ni hpe hkai ga ngu yaw shada nna hpun ni hpe hkai ai re” nga nna tsun ai.
Wunpawng Mungdan Shanglawt Hpung kaw nna mung, Mungkan a woi jasat ai bungli kata kaw rawt malan raitim, shanglawm madi shadaw taw nga ai re hpe hkam la ai re lam, Laiza Ginwang Party Komiti Amu Madu Salang Kaba Npawp Saibu Bai Du tsun ai.
“Wunpawng Mungdan Shanglawt Hpung Ninggawn Daju Party Komiti kaw nna woi jasat let anhte a Mungchying mungshawa ni hpe World Environment Day hta gara hku na shanglawm ra ai lam, mungshawa dap shawa yawng ahkum ara rai shanglawm madi shadaw ai gaw mai kaja ai magam bungli re” nga nna tsun ai.
Hpun hkai ai ngu ai gaw makau grupyin hpe makawp maga ai, tsi tsi ya ai hte bung ai re majaw, World Environment Day hta hpun hkai ai kaw shang lawm lu ai majaw kabu ai lam, Hpun Hkai ai hta tatut shang lawm ai shayi Marip Kumja Doi Ling kaw nna shi a hkamsha lam hpe tsun dan ai.
Dai ni hkai ai hkai bawng ni gaw shingnip mai lu ai, Ju hpun mai galaw ai sha n-ga, makau grup yin hpe tsawm htap shangun ai lu ai May Zali, Gawk Ngu, Pyin Kadu, Miwa Mahkaw hpun, Wa mayan hpun zawn re ni hpe hkai jat ai lam galaw ai re.
World Environment Day hta hpun hkai ai lam hpe Laiza Ginwang Uphkang npu, lawu tsang rung ni, mungchying mung shawa ni, tatut shanglawm hkai shatut ai rai nna, Nam Maling hte Grupyin Gawnhkang Magam Dap kaw nna hpun bawng ni, ladat hpji ni hte garum madi shadaw ya ai re hpe chye lu ai.
World Environment Day hta hpun hkai ai lam hpe Laiza Ginwang Hpun Hkai ai lam hpe Laiza Golf Komiti kaw nna, Laiza Golf Pa mayan hta hpun hkai ai re hpe mung matut chye lu ai.
World Environment Day hta hpun hkai ai lam hpe Laiza ginra kaw galaw ai zawn, nawku hpung ni kaga wuhpung wuhpawng ni kaw nna mung woi galaw ai lam nga na re, hpun hkai ai magam bungli galaw ai ni hpe mungchying mungshawa yawng hte Magam Dap ni a gawng malai chyeju dum ai, grai n-gun lu ai lam, matut nna ndai bungli hpe galaw sa wa ai lam hta mung, Nam Maling hte Grupyin Gawnhkang Magam Dap hte matut mahkai nna ta gindun galaw sa wa ga nga nna Du Kaba, Kumhtat Brang Seng kaw nna tsun lajin da ai re.
