World Open Karate Championship shing jawng poi kaw Myen Mung a gawng malai sa ai hta marai 2 Ja dazik hkam la
November shata 22 ya shani kaw nna 24 ya shani du hkra, Japan Mungdan kaw 4 ning hta kalang galaw ai, 12 lang na World Open Karate Championship shing jawng poi hpe Myen Mung a gawng malai, Jinghpaw Ma marai 4 sa shing jawng ai hta marai 2 Ja dazik hkam la lu ai lam chye lu ai.
Ndai lang na karate shing jawng poi gaw, mungkan hta kaba dik ai shing jawng poi re. Mungdan shara shagu hkan na wuhpung kaba ni sa shing jawng ai, ndai hta dang jang mungkan world champion rai sai, nga nna Zai Wunpawng Kyukoshin Club na Sara Bwilap Ying Bawm tsun da ai.
Shing jawng lawm ai ni gaw, Zai Wunpawng Kyukoshin Club kaw na Shadang Maran Ja La, Shd. Maji Seng Lat Awng, Shayi Maji San Mai Nu hte YMCA na Yaku ni re.
Shadang Maran Ja La hte Shayi Maji San Mai Nu yan gaw, Ja dazik hkamla lu ai rai nna, Shd. Seng Lat Awng gaw nambat 2 gumhpraw dazik hkamla lu ai lam chye lu ai.
Photo: Facebook
