World Teacher Day lamang galaw
Sama Ginwang Sasana Jawngma ni kaw nna lit la woi awn galaw ai, World Teacher Day lamang hpe Sama Ginwang Sasana Lahta Tsang Jawng wang kaw October shata praw 5 ya jahpawt hkying 10:00am aten hta galaw ai lam chye lu ai.
Lamang hta jawngma ni kaw nna jawng sara/num ni hpe kumhpa shagrau ai lamang, chyeju dum ga, hpyi nem ga tsun ai lam hte Sara ni kaw nna shaman ga hkamla ai lamang ni galaw ai re hpe chye lu ai.
2016 ning hta gaw World Teacher Day hpe jawng sara ni kaw nna woi galaw ai raitim, 2017 kaw nna gaw jawngma ni hku nna lamang hpe shaning shagu woi awn galaw ai re lam chye lu ai.
Ya na zawn jawngma ni kaw nna jawng sara/num ni hpe World Teacher Day lamang galaw ya ai a ntsa, Saranum Lahkum Lahpai Ja Nu Ra (Bible English subject hte Social study subject sharin saranum) kaw nna shi a hkam sha lam hpe tsun ai hta,
“Jawngma ni shanhte a hpaji npawt gaw sara/num ni re ngu ai hpe chye na hkap la ai, sara/num ni hpe hkungga ra ai chyeju dum ra ai, chyeju tara ngu nga ai ngu hpe shanhte myit kaw hkawn hkrang ai majaw, lamang hpe galaw ya ai majaw myit hta grai kabu ai” nga nna tsun dan ai.
“Sara masat nhtoi ngu ai gaw anhte jawngma ni myit la ai gaw hkristan ni gaw laning mi hta Christmas poi n galaw ai ten nnga ai shaning shagu galaw ai re majaw, anhte jawngma ni mung World Teacher Day ngu gaw sara ni hpe laning mi hta kalang sha lu galaw ya ai re ngu yaw shada ai re” nga nna Jawngma Komiti Amu Madu Shadang Lazum Peter Ji Wa tsun dan ai.
Lamang byin tai wa na matu jawngma ni kaw nna Fund tam nna galaw ai re lam, COVID-19 ana zinli byin nga ai aten ladaw re majaw, lamang hta Sara/num ni hte jawngma nkau mi shang lawm let jawngma yawng a gawng malai galaw ai re lam chye lu ai.
Ya aten Sama Giwang Sasana Lahta Tsang Jawng hta jawng sara/num ni marai 34 nga ai rai nna, laika hpaji sharin hkamla nga ai jawngma yawng marai 300 jan nga ai lam chye lu ai.
