World Teacher’s Day lamang galaw

Wunpawng Mungdan Shanglawt Uphkang ginra shagu na laika sharin jawng ni kaw, October shata praw 5 ya shani ang ai World Teacher’s Day lamang hpe galaw ai lam chye lu ai.

“Daini na ninghtoi hta gaw tinang hpe sharin wa ai sara, sara num ni hpe chyeju dum ai, shakawn shagrau ai, tsawra myit madun ai masat masa galaw ai shani re” nga nna Laiza Lapran Tsang Jawng a Amu madu saran num N Ding Seng San ya na zawn tsun ai.

Daini na lamang hta numdaw lahkawng garan na galaw ai lam nga ai. Jahpawt daw hta sara, sara num ni hpe kumhpaw kumhpa shagrau ai lam, ga shagawp shing jawng ai lam galaw ai rai nna, shana daw hta gaw Laiza Muklum Zup Awng gawdin pa kaw sara, sara num ni hte jawngma ni gawdin shingjawng ai lam ni galaw ai lam chye lu ai.

World Teacher Day hpe lai wa sai 1994 ning hta Mungkan bungli masha hpung (ILO) hte UNESCO kaw nna, masat da ai ninghtoi re. Mungkan sara masat ninghtoi hpe KIO Uphkang ginra kaw galaw ai sha n-ga, mungkan ting galaw ai lam chye lu ai.