Wunpawng Amyu Sha Zinlum Hpung ni hpe Myen hpyen dap ni jahkring da
Namti Labryaw Yang kaw hpyen yen nga ai Kasung mare mungshawa ni hpe garum ningtum jaw na matu, Hpakant kaw na modo 8 hte yu wa ai Wunpawng Amyu Sha Zinlum Hpung na masha marai 31 hpe, August 17 ya dai ni hkying 11:30am aten daram hta Kamaing makau, pawnghpawm shagyit ( Gate ) kaw sin ai Myen hpyen dap, Dapnu ( 101 ) na hpyen hpung ni hkap jahkring da ai lam na chye lu ai.
Jahkring hkrum ai hte seng nna, Wunpawng Amyu Sha Zinlum Hpung na salang langai tsun ai gaw, Myitkyina kaw na Amyu Sha Zinlum hte Hpakant na Amyu Sha Zinlum ni pawng nna, Kasung hpyen yen ni hpe garum na matu hkyen ai re. Myitkyina ni gaw Namti du taw sai Hpakant kaw na yu wa ai ni hpe Nam Ting gate kaw galang san jep ai dai kaw atsawm tsun nna shalai dat sai, Kamaing makau pawnghpawm gate kaw kalang bai jahkring nna, nanhte nlu lai ai garum ningtum sa ai ngu gaw kadai na ahkaw ahkang, kadai na aming hte sa ai nga jahte tam nna jahkring kau ai, anhte gaw PCG hte seng ang ai Byuha Mu ni hpe shana ai raitim mahtai lawan njaw ai dai majaw anhte gaw nsa sai, bai nhtang wa na, ngu tim n-ginhtang wa shangun ai, hpawt ni gaw Balik dap hte tsun shaga na lam nga ai, nga nna tsun dan ai.
