Wunpawng Amyusha ka-ni nanghpam pat jasan ninghtoi ( D-Day ) hpawng lamang galaw

Laiza Muklum, Sinpraw Majoi Manau Gawknu kaw April shata 25 ya jahpawt hkying 7:00am aten hta Wunpawng Amyusha ka-ni nanghpam pat jasan ninghtoi ( D-Day ) hpawng lamang galaw ai lam chye lu ai.

Rev. Sai La Rip kaw nna hpawng ap akyu hpyi ya ai, Laiza Muklum Uphkang Du Salang Kaba Sabaw La Zau kaw nna Wunpawng Amyusha ka-ni nanghpam pat jasan masing jum hpajang komiti ningbaw a pat jasan D-Day mungga hpe hti shalai ya ai.

Hpawng lamang hta shawa n gun nsen hte “Amyusha ni a hpyen madung ka-ni nanghpam hpe Karai Kangsang a chyalai n gun hte gasat kau na, ka-ni nanghpam hpyen hpe mungshawa ninggun hpungtun hte gasat kau na, ka-ni nanghpam tsin yam hpe yengseng kau lu ai pandung du hkra matut manoi madang shatsaw gasat sa wa na” ngu ai ga baw hpe 3 lang lang marawn tsun ai.

D-day hpawng hta magam dap makan dap na magam gun ni hte mungshawa kanu kawa ramma ni yawng marai 700 jan sa du shang lawm ai lam chye lu ai.

April shata 25 ya shani gaw Wunpawng Amyusha ni a hpyen madung rai nga ai ka-ni nanghpam hpe gasat shamyit na matu majan baw ai masat ninghtoi D-Day hpe lai wa sai 2014 ning April shata 25 ya shani hta masat hpang dat sai re. Ndai D-Day masat ninghtoi hpawng hpe kaga buga ginra ni hkan mung galaw ai lam chye lu ai.