Wunpawng Amyusha Mungbawng Rapdaw (WMR) kasa zuphpawng galaw la lu
Wunpawng Amyusha Mungbawng Rapdaw (WMR) a (5) Lang ngu na mu gun ladaw a, (2) lang na ginra dat kasa hkumra zuphpawng Kaba hpe December shata praw 3 hte 4 ya laman, Wunpawng Amyusha Mungbawng Rapdaw Rung Wang kaw galaw la lu sai lam chye lu ai.
Zuphpawng hta, WMR a du na shaning na galaw sa wa na magam bungli ni, dap komiti ni a magam bungli ni, ginra shagu de na sumtang (report) ni hpe jawm tang madun ai hte Wunpawng Amyusha Mungbawng Rapdaw gaw, mungshawa kaw mahta nna jawm gawgap ai hkrang, grau nna ngang kang ai hku byin wa na lam ni hpe jawm bawngban dawdan la lu sai lam, WMR tsun ahkang lu Sara Nhkum Tang Gun tsun ai.
WMR Ninghpum Salang, Sara Kaba Rev. Dr. Hkalam Samson hpe WMR Tingnyang Up hku nna shatsam da lu sai rai nna, Ninghpum salang langai hte dawdan komiti salang langai hpe mung, bai galai shatsam jat bang ai hpe bawngban shagrin shatsam la lu sai lam, Sara matut tsun ai kaw na chye lu ai.
Ndai zuphpawng hpe laning mi hta kalang galaw ai rai nna, hpawng hta WMR mu gun ni, WMR Ninghpum ni hte dawdan komiti salang ni, ginra shagu de na WMR dat kasa ni shang lawm let galaw ai rai nna, daining gaw COVID-19 ana zinli a majaw, ginra shagu de na dat kasa marai (1) hpra sa du shang lawm ai hte ngam ai ginra dat kasa ni gaw zoom hku nna shang lawm ai lam chye lu ai.
Photo, WMR
