Wunpawng Bawsang hking hte Sam kaba, Sam Hkyeng ni a buhpun sumraw hking shing jawng lamang galaw hkyen
Manmaw Ginwang, Manje Ninghtawn Manje Muklum gawdin pa kaw du wa na December shata 10 ya shani hta Manje Ninghtawn Myen asuya rung kawn woi awn nhtawm, Wunpawng Amyusha Bawsang shagu a buhpun hking hte Sam Kaba, Sam Hkyeng ni a buhpun sumraw hking shing jawng poi lamang galaw hkyen ai lam chye lu ai.
“Ginsup ga baw jaw da ai gaw, Manje Ninghtawn Lutdaw Ninggang (လႊတ္ေတာ္ဖလား) ngu nna jaw da ai, ginsup hpan amyu myu rai malu ai, dai kaw Wunpawng amyusha bawsang shagu a buhpun hking hte Sam kaba, Sam hkyeng ni a buhpun hking shingjawng ai lamang mung shalawm ya ai. NLD ni amyusha ni hpe Me soi ai masa hte 2020 ning na ra lata poi a matu mung loi lawm ai hku nna yaw shada let galaw ai rai ma ai” nga nna Manje mare na Salang langai tsun dan ai.
Ya na zawn Wunpawng amyusha bawsang ni a buhpun sumraw hking hte Sam amyusha ni a buhpun sumraw hking shing jawng ai lamang hpe shawng ningnan lang galaw ai re lam, Salang wa matut tsun ai.
Ginsup ai lamang hpe lai wa sai bat kawn Manje Ninghtawn kata na jawngma ni ginsup hpang nga sai rai nna, December shata 10 ya shani hta gaw, ginsup ginchyum dat na re lam chye lu ai.
