Wunpawng hpawmi Num langai hpe Myen hpyen dap ni adup sat kau

Kutkai uphkang gaiwang, Pyen Bun Uksu lawk, Nam Sung mare Huhpyet buga na Salang Maran Tu Bu a ningrum ningtau jan Nhkum Htang asak 48 ning hpe July shata praw 3 ya shani Myen hpyen dap Hk.M.Y 261 na hpyela ni adup sat da ai lam na chye lu ai.

Adup sat hkrum ai hpawmi jan Nhkum Htang gaw Ma marai 2 a kanu rai nna, Myen hpyen hpung ni gaw Nhkum Htang gat dut nga ai kaw shang wa nna hpa mara mung nnga ai hpe adup sat da ai lam, buga masha ni tsun ai.

Hpa majaw adup sat hkum ai mabyin lawnglam hpe chye lu na matu lit nga ai mare buga Salang ni kaw nna sawk sagawn nga ai lam na chye lu ai.