Wunpawng mungdan kata hta nga ai bawsang amyusha ni a lapran myit hkrum gahkyin gumdin lam lu la na matu, ningmu gahkyin zuphpawng galaw
Wunpawng Amyusha Mungbawng Rapdaw (WMR) kawn woi awn nna bawsang amyusha ni a lapran myit hkrum gahkyin gumdin lam lu la na matu ningmu gahkyin zuphpawng hpe September shata 14 ya shani Myitkyina Muklum, Njang Dung kaw galaw la lu sai lam chye lu ai.
Ningmu gahkyin zuphpawng galaw ai a yaw shada lam hpe Sara Nhkum Tang Gun ya na zawn tsun ai. “Madung gaw anhte Jinghpaw mung kata hta nga ai bawsang ni ma hkra gahkyin gumdin na lam ahkyak ai, anhte a prat galu gaba wa na lam, ngwipyaw simsa na lam ma hkra a npawt gaw myithkrum gahkyin gumdin na lam re majaw, ndai hpe myit mada yaw shada nna gara hku gahkyin gumdin na ngu ai lam hpe gaw gap yang gaja na ngu ai ningmu hpe jawm bawng nna ningmu hpe gahkyin la lu na matu yaw shada ai re” nga nna tsun ai.
Ningmu gahkyin zuphpawng hpe WMR kaw nna woi awn ai hte Wunpawng Amyusha ni myithkrum gahkyin gumdin lam, ngwi pyaw simsa lam, mare buga mungchying mungshawa bawng ring lam hte masing masa ni hpe myit let sa taw ai re majaw bawsang amyusha ni a lapran myit hkrum gahkyin gumdin lam lu la ra ai ngu ai ningmu hku nna zuphpawng galaw ai re lam, Sara matut tsun ai.
Myanmar Munghpawm Mungdan kata kaw nga ai bawsang shagu grau nna kahkyin gumdin na shawnglam hta anhte ra sharawng nga ai jet ai Federal Myanmar Munghpawm Mungdan byin wa hkra, jawm ladat shaw ai zuphpawng mung re lam, Sara Zau Jat tsun dan ai kawn chye lu ai.
Ningmu gahkyin zuphpawng hta saw shaga da ai nawku hpung ningbaw ningla ni, Htunghking Hpung Salang ni, Kachin Mungmasa Party Salang ni, Amyu Shayi ni, Ramma ni hte JLH Dakkasu jawngma ningbaw ni yawng marai 60 daram sa du shang lawm ai lam chye lu ai.
Photo: WMR
