Wunpawng Mungdan Shanglawt Hpung a gawda ai tara majat jaw hpawng galaw
Wunpawng Mungdan Shanglawt Hpung a gawda ai tara majat jaw hpawng hpe October shata 14 ya jahpawt hkying 9:00am aten hta Mungchying Magam Dap (D.G.A) Hpungwa Gawknu kaw galaw ai.
Hpawng hpe Mungchying Magam Dap Pati komiti ni woi awn galaw ai rai nna, majat jaw ai hpe lani mi galaw nhtawm, October shata 15 ya shani hta gaw pati hpung shang salang majing Party Full Fleded (PF) hkrat sai ni hpe Ga Shaka (Oath) jaw ai lam galaw na re.
Majat jaw wunkat hpawng a yaw shada lam hpe, Mungchying Magam Dap Pati Komiti Amu Madu, Salang Kaba N-gan Zau Shawng tsun ai hta “62 ning hpring KIO masat ninghtoi hpe madi shadaw hkaptau la ai masat masa galaw ai lam, Hpung Pati shang masha langai mi a atsam ningja hpe hpringtsup nna, greng grak ai hpung shang masha ni byin tai wa lu na matu, Wunpawng Mungdan Shanglawt hpung a masa lam yan ni hpe grau chye na wa nhtawm, kangka sadi dung ai hte myu tsaw mung tsaw myit ngang kang ai magam gun masha ni byin tai wa lu na matu yaw shada ai re” nga nna Salang Kaba tsun ai.
Majat jaw sharin ya ai hpe, Salang Kaba N-gan Zau Shawng kaw nna sha, sharin ya ai. Sharin hkamla ai magam gun ni yawng marai 143 re. Mungchying Magam Dap Pati Komiti kata hta shingnan hpung shang masha, Party Probationery Member (PP), hte Hpung shang salang majing Party Full Fleded (PF) ni yawng marai 841 rai sai lam chye lu ai.
