Wunpawng shingni hpung Ginjaw, Hkrang Pan Sub-Komiti a 1st lang na Hkrang Pan madun Poi lamang galaw na hkyen
Wunpawng shingni hpung Ginjaw, Hkrang Pan Sub-Komiti a 1st lang na Hkrang Pan madun Poi lamang hpe April shata praw 2 ya shani kaw nna 5 ya shani du hkra Myitkyina, Shatapru manau wang Majoi Gawknu hta galaw sa wa na re lam chye lu ai.
Ndai hkrang pan madun poi lamang hta hkrang pan ning hkring marai 10 jan a hkrang pan sumla 50 jan daram hpe madun sa wa na rai nhtawm shingni shayi shadang sha ni, sumla hkrung shayi shadang ni hte sub-Komiti shagu na ni yawng hte wu wu di di galaw sa wa na re lam Wunpawng Shingni Hpung Ginjaw, Hkrang Pan Sub-Komiti lithkam Sara Myitung Tang Nau tsun dan ai.
Hkrang Pan Madun Poi Lamang a yaw shada lam hpe Sara Myitung Tang Nau matut tsun dan ai hta “ yaw shada ai lam gaw hkrang pan shingni ni hpe htawng madun ai lam re.Grau nna gaw myusha ni a htunghkring hte lam yan, maka ni hpe maigan amyu ni mung mu la, chye la mu ga ngu shamu shamawt ai lam re. Ramma ni mung hkrang pan hpe myit shang sha wa na matu, sa yu n gun lu la nna hpaji lu la na matu hte hkrang pan shingni ninghkring ni a myitkraw kata hkam sha lam ni hpe madun shapraw ai lam ni mung lawm wa na re. Ndai hkrang pan madun poi lamang hpe laning mi hta 2 lang lu galaw hkra shakut sa wa ga ngu jahkrup da ai lam ni nga ga ai” nga nna tsun dan ai hpe chye lu ai.
