Yak hkak nga ai hpung masha htinggaw 570 hpe malu masha garum jaw
Myitkyina Jau Ginwang kata hta yak hkak nga ai Kahtawlik hpung masha htinggaw 570 hpe May shata praw 5 ya shani kaw nna Myitkyina Jau Ginwang kawn malu masha garum jaw nga ai lam na chye lu ai.
Garum jaw ai malu masha ni gaw n-gu bye 5, shakau hpraw, shakau hkyeng, sau hte gala shapre ni re. Covid-19 ana zinli aten na wa ai rai yang, grau yak hkak wa ai masa re majaw, matut nna garum jaw na masing nga ai re lam chye lu ai.
Ya na zawn Covid-19 ana a majaw yak hkak nga ai ten nawku hpung masha ni hpe garum jaw ai yaw shada lam gaw “ nawku hpung hte hpung masha ngu gaw galoi ma maren sha re. Ya aten hta rau sha hkam sha ai, yak hkak nga ai ten hta tinang a hpung masha ni hpe galoi ma myit dum nga ai, hkri dun nga ai, yak hkak ai sagu hpung masha ni hpe lakawn ai lam re” nga nna Myitkyina Jau Ginwang Amu madu Sara Dum Mung Doi Tang tsun ai.
Myitkyina Jau Ginwang kata hta mare lawk 21 nga ai hta hpung masha htinggaw yawng 2000 daram nga ai hta, lawk shagu na yak hkak nga ai hpung htinggaw 570 hpe malu masha garum jaw ai re lam chye lu ai.
