Yang Wu Buga sasana (100) ning hpring hte Nawku hpung de ai (100) ning hpring jaw chyeju shakawn hpawng galaw

Mungmau Ginwang, Yang Wu Buga Hkalup hpung sasana shang ai (100) ning hpring hte nawku hpung gaw de ai (100) ning hpring jaw chyeju shakawn hpawng hpe December shata 22 ya shani kaw nna, 25 ya shani du hkra Yang Wu Rudi sasana jawng wang, Kadaw Kawng hta galaw nga ai lam chye lu ai.

Galaw sa wa na lamang ni hta December shata 22 ya shani gaw kapang hpaw hte man dat hpaw, 23 ya shani hta mara raw akyu hpyi hte chyum laika sharin, 24 ya shani hta gaw Yang Wu Buga hpung sasana shang ai (100) ning hpring hte nawku hpung de ai (100) ning hpring jaw poi chyeju shakawn hpawng lamang rai nna, 25 ya shani gaw Christmas poi nawku hpawng lamang ni re lam ginra masha langai tsun ai.

Ndai jaw poi hta manau woi manau na ni December shata 12 ya shani kaw nna, December shata 20 ya shani du hkra manau nau ai lam hpe sharin ya nhtawm, manau woi manau sa wa na re lam chye lu ai.

Yang Wu Buga mare kahtawng ni gaw Loi Hkyep, Nam Ban, Loi Yai, Saga, Man Myeng, Man Kang, Kadaw Kawng (Ginjaw), Yang Wu, Dingga, Chyam Ka hte Maw Swi mare kahtawng nawku hpung ni re lam chye lu ai.

Jaw chyeju shakawn hpawng hta KTC Kutkai Chyumjawng Choir hpung, Mungmau Ginwang Buga (23), Man Wing, Bang Gaw, Bang Htan, Yang Wu Buga na pru mat wa ai ni yawng, Rev. Lahpai Zau Sam a kashu kasha ni hte Rev. Dr. Zinghang Lat Nawng ni yawng hpe saw shaga ai lam chye lu ai.

Yang Wu Buga Hkalup hpung sasana shang, hpung de ai gaw lai wa sai 2014 ning hta (100) ning hpring sai raitim, dai aten mung masa hpyen masa a majaw buga masha ni hpyen koi yen ra mat nna, nlu galaw mat ai hta ya aten buga masha ni bai wa zup let, jaw poi hpe galaw sa wa ai re lam chye lu ai.