Ye mase tam ai mungmasha langai hpe Myen Balik ni gap sat

Hpakant, Lawnghkang Sanghka maw na Moepin achyutu side One Brother ( 111 ) Company kaw sin ai Myen Balik  ni gaw February shata praw 4 ya jahpawt hkying 10:00 am aten hta lungseng tam ai mungmasha langai hpe sinat hte  gap sat kau ai lam chye lu ai.

Gap sat hkrum ai mungmasha gaw U San Kyaw hte Daw Khin Than Aye yan a kasha Shadang Kyaw Zin Phyoe asak 25 ning re.

Ya na zawn gap sat hkrum ai hte seng nna Lawnghkang mare na Salang langai tsun ai gaw “Lungseng nhkun de shang ai aten nre kaw shang ai majaw Company wang kaw shimlam la ya ai Dap masat 26 na Balik ni sinat hte gap dat ai hta baw kaw pala hkra nna dai shara kaw si mat ai, moi mang hpe Lawnghkang mungshawa tsi rung kaw, ga gadoi jep joi ai lam galaw ai” nga nna Salang wa tsun dan ai.

Kyaw Zin Phyoe gaw Moegong Myu Ne Nammana mare masha rai nna Lawnghkang, Sut Awng mare kaw nga let Lungseng tam nga ai re lam chye lu ai.