Yu ngwi ninghkring Myitung Tang Nau @ Ying Chang Madu Yesu hta yup pyaw mat

Yu ngwi ninghkring Myitung Tang Nau @ Ying Chang asak 46 ning gaw, October shata 17, bat hpang 4 ya jahpawt hkying 8:45am aten hta Madu Yesu hta yup pyaw mat wa sai lam na chye lu ai.

“Shi na mabyin hpe tsun ga nga yang, shi gaw sai rawt jit dwi ana nga ai le, shingni komiti rung de sharin hpawng sa wa yang, cycle gawt nga ninglen lam makau de sa mat nna wa galau ai, sai rawt wa ai she nrai na, tsi ding yang gaw sha ai re dai jahpawt nsha byin ai kun gara hku kun? Shi kaw hkanjawn nang ai Ma gaw hpa nra ai, tsi rung kaw htaw du yang tsi Sarawun gaw asak n nga sai ngu hkap tsun ai da, dai jahpawt ngai mung nnga taw ai, shi ya hte hkam nau nkaja ai” nga nna nnga mat wa sai yu ngwi ninghkring Myitung Tang Nau a ningrum ningtau jan, Saranum Nhkum Ja Ra tsun ai.

Yu ngwi ninghkring Myitung Tang Nau @ Ying Chang gaw, Ga Shagawp Sara Ying Mun Nau mung rai nna, Wunpawng Shingni Hpung Ginjaw a Ningtau Ningbaw magam let hpe gunhpai nga ai re.

Yu ngwi ninghkring Myitung Tang Nau @ Ying Chang nnga mat ai lam hpe grai nja, lahpawt dum ai lam hpe, yu ngwi ninghkring Lama Sut Gun (+3) kaw nna mung ya na zawn tsun ai.

“Sara Tang Nau gaw anhte a Wunpawng Shingni Hpung Ginjaw Komiti Rung kaw na ningtau ningbaw mung rai sha n ga na, ndai zawn rai langai mi hkrat sum mat ai gaw, Shingni myit rum manang langai hku nna grai n ja ai, grai lahpawt dum ai. Hpa majaw ta nga yang shi gaw Shingni hpe grai chye tsawra ai kaga manaw manang ni a ntsa kaw grai sadi dung ai, Shingni hpe ma galoi mung ခုတုံး ဗန္းျပ nna bungli galaw ai kaw ma nlawm ai, Shingni hpyenla jet jet nan ma re. Dai majaw anhte na matu gaw hpu shawng hpu ba kaja langai mi hkrat sum mat wa ai ngu gaw, matut nna anhte a kanau kaji ni hkawm sa wa na lam hta kasi law law naw mai, hka ja la ai ten kaw jau jau nnga mat ai gaw grai lahpawt ai” nga nna tsun ai.

Makoi mayang akyu hpyi hpawng hpe October shata 19 ya shani ka-ang hkying 12:00noon aten hta Janmai buga hpung lawk (8), lam masat (15), Sein Min Sau Pump shingdu, Aye Mya Thayar kaw galaw nhtawm, Wunpawng Hkristan lupding lupra, Nawng Nang de makoi mayang na re lam chye lu ai.