Yu Ngwi Pinra sa yu na wa ai Wunpawng ramma marai ( 3 ) hpe, Balik hking hte P.T.Ts hkying lang ai la marai ( 3 ) hkap kahtam
Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 9 ) ginra, Namjang Buga Je Lan Namti mare na Wunpawng ramma marai ( 4 ) hpe May 28 ya shana yup tung
hkying 12:30am aten daram hta P.T.Ts hking hte Balik hkying lang ai la marai ( 3 ) lam kaw hkap jahkring san jep nna, nhtu hte kahtam da ai lam, buga masha ni kawn chye lu ai.
Mabyin hpe Namti mare na salang langai tsun ai gaw, Muse Man Mau mare kaw, Hpyen yen alu tam Yu Ngwi Pinra Lamang sa yu nna, bai nhtang wa ai shaloi Manwin Daw ( 3 ) kaw Balik hking hte P.T.Ts hking lang ai la marai ( 3 ) gaw sinat nhtu ni hte, Cycle jawn wa ai Shd. N-gyem La San hpe shawng hkap sawk jep, adup nna, dai wa gaw lu hprawng mat wa ai kaw she, Shd. Tangbau Naw Li hte Shd. Naw Hkam yan mung bai hkan nang ai hte san jep ai lam mung nnga ai sha, kalang dat nhtu hte hkap shaw kahtam ai hku rai nga ai. Naw Li a la hkra na pawt hte pai shingma kaw kahtam hkra ai, dai kaw Cycle hte phone mung tat kau ai, shi hpe gaw manang ni bai lu lakawn la ai hku rai nga ai. Nga nna tsun dan ai.
Ngam ai marai ( 2 ) gaw tsi rung rawng na daram nrai tim loi machyi hkrum ai, Shd. Tangbau Naw Li gaw hkala sawng ai majaw, ya aten Muse tsi rung kaw tsi tsi hkam la nga ai lam chye lu ai.
Ndai amu manghkang hte seng nna, Balik ni gaw nanhte gara hku byin mayu ai. Amu hpaw mayu ai kun, nga nna sa san ai lam gaw nga ai, machyi hkrum ai ni gaw, masha hpe mung nlu matsing dat, kadai hpe kaning ngu na mung nchye tsun ga ai ngu, Balik ni hpe bai tsun htang dat ai lam, salang wa matut tsun ai kawn chye lu ai.
