Yup tung jahpan gumshem Myen hpyen ni hkan hta nga

Htinggaw yup tung jahpan hpe January shat praw 5 ya shani kaw nna, gumshem Myen hpyen ni ginra nkau mi hta hkan hta nga sai lam chye lu ai.

Yup tung jahpan hpe praw 9 ya shani kaw na she hkan hta na nga ai raitim, praw 5 ya shani kaw na hkan hta nga sai re lam, dai hkan hta ai hta praw 9 ya shani na nhtoi hpe lang na hkan hta nga ai re nga nna, ginra masha ni tsun wa ai.

Ndai lam hte seng nna ginra masha langai tsun wa ai hta “Grai hkrit tsang ra ai hku galaw ma ai, shanhte gaw ndai lam hpe line ntsa mung hkum mara, sumla dem ai lam ni nmai galaw ai, yawng mayawng hpe hkum tsun dan nga tsun ai re.”

Lawk shagu hkan hta hkawm ai hta htinggaw law nlaw hpe yu nna, masha garan let, hkan hta hkawm ai hta wuhpung shagu hta gumshem Myen hpyen magam gun marai 2 lawm ai lam chye lu ai.

Gumshem Myen hpyen mungchying rung na htinggaw jahpan copy la sa wa nhtawm, nta masha ndai ma hkra rai nrai, nta masha yawng nga nnga, sumtsan hkawm ai lam nga nnga dai ni matsing la ai re lam chye lu ai.

Ndai zawn hkan hta hkawm ai hta shata 3 na hkawm ai ni hpe gara de hkawm ai lam matsing la rai nhtawm, htai ya ai wa a mying, phone number hte ta masat htu shangun ai lam ni galaw ai hpe chye lu ai.

Ya na zawn htinggaw yup tung jahpan hkan hta hkawm ai lam gaw lai wa sai 2022 ning December shata hta lawk mare salang ni hpe gumshem Myen hpyen ni kadai nchye ai hku zuphpawng woi hpawng let, galaw sa wa ai rai nna, Myen mungdan shagu de galaw sa wa na re lam chye lu ai.