Zai Awng Hpyen yen dabang de Myen hpyen dap ni sinat kaba gap bun ai majaw Hpyen yen mung shawa ni kalang mi bai hpyen koi yen hkawm ra

December praw 27 ya shana daw hkying 6:00pm aten daram kaw nna Myen hpyen dap ni Zai Awng hpyen ye dabang grupyin shara ni de laknak kaba ( 11 ) lang gap bang ai majaw

hpyen yen mung shawa ni hkrit kajawng nna Hkau Shau mare maga de akajawng sha hkyak hkyak hprawng yen ra mat ai lam chye lu ai.

Asak kaba sai dinggai dingla ni hte ma kaji ni hpe gaw Ginjaw Hpyen yen lakawn lanawn Komitti kawn woi awn nna Hkau Shau de sa wa ai lam makau hkan byin mai ai hku gan shanu da shangun ai lam mung chye lu ai.

Zai Awng Hpyen yen dabang gaw lai wa sai 2011 ning majan nnan byin wa ai ten hta San Pai mare, Dingga mare, Ga Ra Yang, Sut Hkawng mare makau grupyin hkan na mung shawa marai ( 2800 ) daram koi yen nga ai hpyen yen dabang rai nga ai.