Zaubung Htingnu makau kaw gumshem Myen hpyen dap hte KIA ni gasat gala majan byin

KIA Masat (3) Dap Ba, Masat (27) Dap Dung ginra hta hpyen shamu shamawt hkawm ai, gumshem Myen hpyen dap hte KIA ni January shata 30 ya shana maga hkying 4:20pm aten kaw nna hkying 5:20pm aten hkying mi daram Zaubung Htingnu makau kaw gasat gala majan byin ai lam chye lu ai.

Gumshem Myen Hpyen Dap, Hk.L.Y (223) dap hte Hk.M.Y (424) dap na pawng hpawm hpyen n gun 100 daram gaw Kai Htik Post kaw na nhtang yu wa ai ten KIA ni hkam tawn ai bawm kapaw la nna matut yu wa yang, Zaubung Htingnu makau kaw gasat poi byin ai re lam, shawng lam na lit nga ai salang ni shana wa ai.

January shata 27 ya shani hta mung, Dap Dung (27) ginra, Maji Gung Kaba kaw shara la nga ai, gumshem Myen Hpyen Dap ni kawn Zaubung hte Uram Bum maga de laknak kaba gap hpang wa ai majaw, KIA ni mung laknak kaba hte bai nhtang gap bun ai lam chye lu ai.