JHG hte Lung Sha Yang Gaiwang Htunghking Salang ni kaw nna Wunpawng amyusha ni a ginru ginsa yu hkrat wa ai labau ni hpe sawk sagawn hpang nga

Jinghpaw Wunpawng Htunghking Hte Laili Laika Hpung Ginjaw (JHG) Labau Komiti, Sut Tam Komiti ni hte Putao Ginwang Lung Sha Yang Gaiwang Jinghpaw Wunpawng Htunghking hte Laili Laika Hpung ni pawng hpawm nna Jinghpaw Wunpawng amyusha ni a ginru ginsa yu hkrat wa ai labau shang shara ni hpe October shata 16 ya shani kaw nna sawk sagawn hpang nga sai lam, JHG kaw na chye lu ai.

Jinghpaw Wunpawng amyusha ni a ginru ginsa yu hkrat wa ai labau shang shara 11 hpe sawk sagawn sa wa ai hta, Ntawt Ja Ra Yang Ga Kitawt Bum majoi a lam, Mashang Hka hte Nlung Baren a lam, Mali Hku Majoi hte Machyai Hku Majoi a lam, Hkring Gun Majoi hte ginru ginsa yu hkrat wa ai lam, Maden Shawa Nang Htingnu Gap shara tam ai lam, Marit Ning E Hku Ja Tawng ni a Ma-u Du Zingsut tam na lam, Nga lai wa sai mare buga bum pa hkashi hkanu hte labau shang shara ni, Dung lahkrip bum hte Magwi Ding Bum na Naura Pa, Ma Sha Galang Gap ai lam, Machyi Hku Bum Sa Wa Majoi Ru Marawn Sinit Ninghtawn a lam hte Ndawng Bum a lam ni hpe sawk sagawn sa wa na re hpe na chye lu ai.

Sawk sagawn ai lam hta JHG Labau Komiti Ningtau Ningbaw Duwa Nlung Ja Naw, JHG Ningbaw Malai Duwa Mairawn Awng Jat, Sut Du Lashu Naw Awng, Putao Giwang Htunghking Salang ni hte Putao Lung Sha Yang Htunghking Salang ni shanglawm nhtawm, Jinghpaw Wunpawng amyusha ni a ahkyak ai labau shang shara ni hpe dai shara de nan sa nna sawk sagawn hpang nga sai lam, JHG Ningbaw Du Wa Htingnan Yaw Sam ya na zawn tsun dan ai.

“Jinghpaw Wunpawng amyusha ni gaw nambat langai labau grai ahkyak ai, labau mat jang htunghking mat na, htunghking mat jang amyu mat na nga re majaw, Mungkan hta labau ngang ra ai, labau ni hte madi ra ai re, labau hpe anhte shangang yang she anhte a kam maka anhte a lamu ga hpe anhte nan uphkang, anhte kam maka hpe anhte nan ka lu ai madang de rai wa na re, labau hte shaga wa ra ai prat rai sai majaw JHG kaw nna ndai hpe shangang shakang sa wa ai hku re” nga nna tsun ai.

Sawk sagawn la lu sai labau ni hpe Jinghpaw Wunpawng amyusha ni hpe labau laika shapraw ya na rai nna, htawm hpang na kashu kasha ni yawng chye na matu hte Jinghpaw Mung kata shanu nga ai bawsang amyusha ni yawng mung, lamu ga madu ni gaw wunpawng amyusha ni re ngu ai hpe chye wa lu hkra ngu yaw shada let labau laika buk byin hkra sawk sagawn sa wa na hte ndai labau laika hpe Jinghpaw Mung kata na Myen Asuya Hpaji jawng ni hta mung, subject langai hku sharin sa wa na re lam chye lu ai.

Photo Credit; JHG News Kachin State