Shwegu ginra gasat gala majan laja lana matut byin nga
KIA Masat (11) Dap Ba, Masat (12) Dap Dung, Shwegu ginra hta gasat gala majan laja lana matut byin nga ai lam chye lu ai.
August shata praw 3 ya shana maga hkying 5:00pm aten daram kaw nna, Shwegu ginra ရွှေဘုန်းမြင့် hpung kyi jawng kaw dap jung shara la nga ai gumshem Myen hpyen dap hte KIA pawng hpawm hpyen hpung ni gasat gala majan laja lana byin nga ai lam, shawnglam lit nga ai salang ni kaw na chye lu ai.
Gasat gala majan byin nga ai hta gumshem Myen hpyen dap ni nbungli hte gap gasat nga ai rai nna, August shata praw 4 ya jahpawt hkying 1:00am aten daram kaw nna mung, Jet nbungli hte bawm (4) lang wa gap gasat kau da sai re lam chye lu ai.
ရွှေဘုန်းမြင့် hpung kyi jawng kaw dap jung nga ai gumshem Myen hpyen dap hpe KIA pawng hpawm hpyen hpung ni gasat zing madu la lu sai lam, shiga lawk nkau hta tang madun da ai lam nga ai raitim, lawng lam hkum zup hpe matut sagawn nga ding yang re.
Shwegu ginra hta gaw shani shagu ngu na KIA pawng hpawm hpyen hpung ni hte gumshem Myen hpyen dap ni laknak kaji kaba, drone ni hte gap gasat hkat nga ai rai nna, lahkawng maga hpyen masa shaja hkat nga ding yang re ai hpe chye lu ai.
