2026-2027 hpaji ladaw No. (I) lang na jawngma kanu kawa sara man hkrum hpawng hte ningtawn jawngma shagrau hpawng galaw
Wunpawng Mungdan Shanglawt Asuya, Laiza Lahta Tsang Jawng a, 2026-2027 hpaji ladaw No. (I) lang na jawngma kanu kawa sara man hkrum hpawng hte ningtawn jawngma shagrau hpawng hpe August shata 26 ya jahpawt hkying 9:00am aten hta Laiza Muklum Rawt Ninghkawng Gawknu hta galaw la lu sai lam chye lu ai.
Hpawng lamang hta Du Kaba Wana Yaw Htung (Ginjaw Hpaji Dap Lit Hkam) kaw nna, Wunpawng Mungdan Shanglawt Hpung, Wungpawng Mungdan Shanglawt Kongsi kaw na lam masan da ya ai kata hta tinang a lagaw tinang tsap ai federal hpaji masing masa lam ni hpe, Ginjaw Hpaji Dap gaw tatut hkrang shapraw woi awn galaw sa wa nga ai rai nna, magup sumhpa ni hpe tsun jahpra sang lang shatsam mungga tsun ai re.
Laiza Lahta Tsang Jawng a, Jawng Up Saranum Kaba Banglang Seng Bu kaw nna, jawng sumtang tang madun ai lam, jawngma kanu kawa komiti ni hku nna mung, sumtang tang madun ai lam galaw ai hpe chye lu ai.
2025-2026 hpaji ladaw hta (A+) hte ningtawn ai hku nna awng pru ai jawngma ni, jawng sa man ai saranum ni, jawng sara magam gun (10) ning hpring, (20) ning hpring sai ni, htawt sit/sa hte pru hkring sa sai sara/num ni hpe kumhpa shagrau ai lam galaw ai re.
Wunpawng Mungdan Shanglawt Asuya jawng kaw tsang masat ai hta lawung tsang hpe tsang (6) du hkra masat ai, lapran tsang hpe tsang (9), lahta tsang hpe tsang (10,11,12) masat ai. 2026-2027 hpaji ladaw hta sharin hkamla nga ai jawngma yawng marai 79,212 re, sharin sara/num yawng marai 8,255 rai nna, Lawu Tsang Jawng (493), Lapran Tsang Jawng (115) hte Lahta Tsang Jawng (46) re lam, Ginjaw Hpaji Dap sumtang kaw na chye lu ai.
