Mandalay maga na rawt lung wa ai hka sanghpaw 36 kaw na sanghpaw 15 gaw, Jinghpaw mung de lung wa
Mandalay Gawwun sanghpaw daru kaw na, August shata 21 ya shani rawt lung wa ai, gumshem Myen hpyen hka sanghpaw 15 gaw, Jinghpaw mung de lung wa sai lam na chye lu ai.
Ndai hka sanghpaw hpung ni Katha Muklum de du shang wa sai rai nna, hka lam ding yang nbungli hte shim lam la ya ai sha n-ga, shanhte ntsen nhten ai hka lam mayan na mungshawa ni nga ai mare kahtawng de, laknak kaji kaba jak sinat ni hte hkrup mara gap dumbre bun ai lam, lit nga ai salang ni kaw na chye lu ai.
Dai ni August shata 25 ya jahpawt hta hka sanghpaw hpung ni hpe shimlam la ya na matu, Shwegu kaw na pru wa ai gumshem Myen hpyen n-gun 100 daram hpung ni gaw, Ngabatwa maga na mungshawa marai 30 daram hpe mung rim woi mat ai lam, ginra masha ni tsun ai kaw na chye lu ai.
Gumshem Myen hpyen dap a, hka sanghpaw hpung ni hpe lam lapran kaw KIA hte ginra makawp PDF pawng hpawm hpyen hpung ni, First Person View (FPV) suicide drone ni hte hkap shingla gasat ai lam ni nga ai re.
Ya aten majan laja nga ai Shwegu hpyen man hte Manmaw hpyen man shara de, gumshem Myen hpyen dap gaw, lagaw lam hte n-gun jat na matu nmai byin sai majaw, lanam ta hka kaba ai aten hta hka sanghpaw hte hpyen lang arung arai machyu pala hte hpyen n-gun wa sa ai re lam, Manmaw kata kaw naw rawng nga ai Myen hpyen ni hpe mung, Y-8, Y-12 nbungli kaw nna shani shagu hpyen lang arung arai ni hpe wa jahkrat ya nga ding yang re lam, shawng lam na lit nga ai salang ni tsun ai kaw na chye lu ai.
