Kan mase ana a majaw masha marai (9) asak si sum

Putao Ginwang Hkakaburazi ginra hta nga ai mare kahtawng nkau ni hta April shata kaw nna, byin hpang wa ai kan mase ana a majaw, masha marai (9) asak si sum mat sai lam ginra masha rai nga ai, Salang Sanlu Ram Seng shiga jaw la ai kaw na chye lu ai.

Ndai kan mase ana gaw gara ginra kaw na byin wa ai hpe nchye lu ai nga nna Salang Sanlu Ram Seng tsun ai hta “yak hkak ai lam grai law ai, tsi hpan langai mung nnga ai, Putao kaw na lagaw lam hte 5, 6 ya sa ra ai ginra re. Modo lam nnga ai yak yak hkak hkak hte sa ra ai, asak si sum ai ni gaw, asak 50 ning, 70 ning hte 5 ning npu na Ma ni re. Ya mung machyi masha ni naw nga ai” nga nna tsun ai.

Hkrun lam yak hkak ai sha n-ga, phone matut mahkai mung yak ai ginra re majaw, garum ningtum ni du na matu grai yak ai shara re hpe chye lu ai.

“Mungdan Asuya kaw nna mung, mungshawa ni a matu lawan ladan lam hpaw shangun mayu ai, shaning shagu yak hkak nga ai re majaw, kalang sha tsi mawan wa jaw ai hte sha nmai byin ai, mare kahtawng shagu hta nrai tim mare langai lahkawng hta tsi jaw gawk hpaw ya shangun mayu ai. Ana zinli gaw kan mase ana sha nre, mungshawa ni hta mung malu masha, hkamja lam, hpaji lam, sut masa lam ni a majaw hkawm wa hkawm sa ra ai re” nga nna salang wa matut tsun ai.

Ya na zawn kan mase ana byin ai hta asuya ni hku nna, garum jaw ai lam nnga ai raitim, Muklum mare kaba hkan nga ai jinghku jing-yu ni hku nna mai byin ai daram tsi mawan ni hpe garum jaw ai lam chye lu ai.

Ndai kan mase ana gaw shaning shagu byin ai raitim, lai wa sai shaning hkan gaw asak si sum hkra re ai lam nnga ai re, 2020 ning hta gaw asak si sum ai kaw du hkra byin ai re hte kan mase ana hta lai nna kaga ana ni byin wa na hpe dai ginra na mungshawa ni hkrit tsang nga ai lam, buga masha ni tsun ai kaw na chye lu ai.

Photo Credit; Sanlu Ram Seng