Mung Myit Sinli ramma shawa hkrumzup sharin bawngban hpawng galaw
Mungmyit Sinli (Kachin Sub State Ga) shawng nnan lang na, ramma shawa hkrumzup sharin bawngban hpawng hpe September shata praw 6 ya shani kaw nna, praw 8 ya shani du hkra Dima nawku hpung kaw galaw ai lam chye lu ai.
Sharin hpawng hpe Mung Myit Sinli Ramma Hpung ni kaw na woi awn galaw ai re lam chye lu ai.
Sharin hpawng a yaw shada lam hpe Mungmyit Sinli Ramma Hpung a Ningbaw Sara Shakoi Dau Ze tsun ai hta “Mungmyit Sinli Ga nga, Wunpawng ramma ni tinang lamu ga tinang shangang sa wa na lam” re nga nna Sara tsun ai.
Sharin ginhpan ga baw ni gaw, Sara Dau Hka (Wunpawng amyusha ni a mung masa philosophy), Sara Lahpai Tu Hkawng (Ninggawn mungmasa), Duwa Lawhkum Lahpai Ura Naw (Mungmyit Sinli Labau), Sara Lasang San Li (Shanglawt hkrunlam hta Mungmyit Sinli Ramma ni gara hku shanglawm na, IT hte ဆုိက္၀ါး ) ni rai nna, yu ngwi mahkawn sharin ai hpe yungwi ninghkring Nhkum Brang Tawng hte shayi Maru Hkawn Ra yan sharin ya nhtawm madum hpe Sara Lamu De Li ni re lam, Sara tsun ai.
Sharin hpawng hta bawngban la lu ai lam hta ramma hpung a gawda ai tara, shawnglam (15) ning masing jahpra hkat lu ai lam, Mungmyit Sinli shangang masing ni rai nna, Ginwang masum hpe mung hpaw jat la lu sai hta (1) Kangming Loidau Ginwang (2) Mungmyit Ginwang (3) Munggu Ginwang ni re lam chye lu ai.
Sharin hpawng hta Ginwang (3) kaw na rai nga ai, Lashio Ginwang, Kutkai Ginwang hte Muse Ginwang na ramma 200 sa du shang lawm bawngban ai rai nna, ndai hpawng hpe lahkawng ning hta kalang galaw ai re hte bai du wa na lahkawng lang na Mungmyit Sinli ramma sharin bawngban hpawng hpe Lashio ginwang hta bai galaw na re lam chye lu ai.
