EEDY NEWS News and Development
46 ning hpring 47 lang na share shagan masat ninghtoi hpawng hpe August shata 10 ya shani hkying 9:00am aten, Sinpraw Majoi Manau Gawknu hta galaw ai lam chye lu ai.
Hpawng hta Wunpawng Mungdan Shanglawt Hpung, Ginjaw Komiti Tingnyang Up a share shagan masat ninghtoi mungga hpe Ningtau Ninggawn Amu Madu, Salang Kaba Labang Doi Pri Sa hti shalai ya ai.
Share shagan masat ninghtoi hta Ginjaw Komiti Tingnyang Up Malai, Du Daju Jum Gunhtang Gam Shawng kaw nna mung, n-gun jaw shatsam mungga jaw ai hta “Dai ni na anhte a share shagan masat ninghtoi ngu ai nhtoi ndai hta e, anhte a yawng yawng ap nawng arang bang sai, htum hkra, ma hkra arang bang ngut sai ni hpe e shagrau sha-a ai, myit dum ai, hkungga ai, dik hkra manu shadan ra ai nhtoi re, hpa majaw nga yang ndai gaw hpan da madu karai wa kaw e anhte rawt malan ndai rawt malan na ang a ni, ngu na e karai kasang kaw anhte san yu sai, san yu nna e karai kasang madi shadaw ai kumla madun ai majaw, karai kasang hkraw ai majaw galaw wa sai re, ndai mungshawa laknak lang ai rawt malan ndai hpe e galaw wa ai shaloi dai ni anhte hkungga jaw ai, myit dum ai, shagrau sha-a ai share shagan manu dan la ai share shagan ni shanhte a, manu dan la ai asak arang bang tawn let, rawt malan rai sai” nga nna tsun ai.
“Dai ni na rawt malan nhtoi hta e shanhte hpe hkung ga la ra ai, shanhte hpe shagrau sha-a ai, chyeju dum ai sha nre, anhte ndai hta n-gun la nna shanhte hpe sadi dung ai lam anhte ga sadi jaw ra ga ai re, anhte asak ap nawng mat wa sai share shagan ni a ntsa, hta-ni hta-na sadi dung ga” nga nna Dukaba matut tsun ai.
Share shagan masat hpawng hta rawt malan dap hpawm hpung hte NUG ni kaw nna, shagun dat ai shagun laika hpe Du Up Jum Lahpai Hing Wawm (NGK, Shingtau Tingnyang Up-ll) hti shalai ya ai re.
Masat ninghtoi hpawng hta Magam Dap, Makan Dap na magam gun kaji kaba hte mung shawa law law sa du shang lawm nna galaw la lu sai hte Je Yang, Woi Chyai hpyen yen dabang kaw mung share shagan masat nhtoi hpe galaw ai lam chye lu ai.
