EEDY NEWS News and Development
63 ning hpring rawt malan masat nhtoi hpawng lamang hte shagrau sha-a ai lam hpe February shata praw 5 ya jahpawt hkying 9:00am aten hta Mung Seng Yang Golf pa kaw galaw la lu sai.
Masat nhtoi hpawng lamang hta (63) ning hpring rawt malan mungga hpe Du Kaba Dashi Brang Nan (Myu Sha Dap Hpawm Ningbaw) kaw nna, hti shalai ya ai lam galaw ai.
KIO, KIA Ningbaw Kaba a (63) ning hpring rawt malan masat nhtoi shatsam mungga hta
“Law la ai hpyen hpe dang manga kau lu na matu shanglawt hpyen dap hta asak aprat ram ai ramma ni ninggun hpungtun kaba hte shanglawm, ap nawng shakut shaja sa wa na gaw ndai aten nan rai sai. Dai re majaw anhte ra sharawng ai pandung de du hkra shakut shaja sa wa ai rawt malan ningsang magam bungli hta dai ni na ramma ni yawng shanglawm na matu shatsam dat ai.
Wunpawng Mungdan Shanglawt Hpung gaw gumshem Myen dap hpe rau jawm gasat nga ai, wuhpung wuhpawng ni hte bawngban jahkrup ai lam ni ding yang galaw nga ga ai rai nna, gasat poi shang nga ai kaga wuhpung wuhpawng ni hte mung, ra ai hta hkan nna bawngban ai lam ni galaw sa wa na re” nga nna tsun da ai.
Dai ni na hpawng hta magam gun ladaw (60) ning hpring sai magam gun marai (1) hte magam gun ladaw (50) ning hpring sai magam gun marai (3) hpe shagrau sha-a ai lam galaw ai re.
(60) ning hpring sai magam gun hpe Ja jet lap manga re, Ja Dakama hte gumhpraw sen manga shi shagrau ai rai nna, (50) ning hpring sai magam gun ni hpe Ja jet lap lahkawng re, Ja Dakama hte gumhpraw sen shi hpe shagrau ai lam galaw ai.
63 ning hpring rawt malan masat nhtoi hta magam gun ladaw (5) ning hpring sai amyu shayi marai (33), (10) ning hpring sai magam gun marai (1009), (20) ning hpring sai magam gun marai (235), (30) ning hpring sai magam gun marai (75), (40) ning hpring sai magam gun marai (14), (50) ning hpring sai magam gun marai (3) hte (60) ning hpring sai magam gun marai (1) ni hpe shagrau sha-a ai lam galaw ai rai nna, dai ni na rawt malan masat nhtoi hta shagrau kumhpa hkamla ai magam gun yawng marai (1370) re lam chye lu ai.
Rawt malan masat nhtoi hpawng lamang hpe Magam Dap, Makan Dap, mare lawk shagu hte hpyen yen dabang shagu hta galaw ai rai nna, lai wa sai shaning ni hta rawt malan masat ninghtoi hpawng lamang hpe mungshawa law law hte galaw la lu sai raitim, dai ning gaw mung masa amyu myu a majaw kadai mung kade a shara kaw galaw ai re hpe mung chye lu ai.
