EEDY NEWS News and Development
(63) ning hpring Wunpawng Mungdan Shanglawt Hpung masat ninghtoi hpawng hte magam gun ladaw (60) ning hpring sai magam marai (6) hpe shagrau sha-a lam hpe October shata 25 ya jahpawt hkying 8:00am aten hta Laiza Muklum kaw galaw la lu sai lam chye lu ai.
Hpawng hta nawku hpung woi sara ni akyu hpyi ya ai hpang, Sara Kaba Sumlut Gam (Ginjaw Komiti Tingnyang Up Malai ll) kaw nna, (63) ning hpring Wunpawng Mungdan Shanglawt Hpung Masat ninghtoi mungga hpe hti htawn ai.
Ndai mungga hta “Lam shagu hta yakhkak ginchyum chyat wa nga sai gumshem hpyen kongsi gaw, mare kahtawng law law hta Pyi Tu Tsit hpung ni hpe ma-ja ladat hku hpaw ninghtan wa nga ai lam mu lu ai.
Mungchying mungshawa shada hpyen tai hkat wa mai ai, ndai Pyi Tu Tsit hpung ni hta mungshawa ni kadai mung n shang lawm ga, koi yen lu hkra ladat shaw ga ngu aja awa shadum dat mayu ai lam, Ka-ni nanghpam pat jasan lam gaw, amyusha ni hkum ding dek lit la gun hpai ra ai bungli re.
Mungdan masa shuk shanut nga ai aten hta ka-ni nanghpam hpaga masha ni hte gumshem hpyen kongsi a majaw, nanghpam tsi mawan hkum sumhpa grau law wa ai hpe mu lu ai.
Dai re majaw, Party Komiti tsang shagu gaw ginra ka-ni nanghpam pat jasan hpung ni hte mahkri shawn, lata gindun nna pat jasan bungli hpe shakut shaja shang lawm nga na matu htet shana dat ai” lam mungga hta lawm ai hpe mu chye lu ai.
Du Daju Jum Nban La hte Du Daju Jum Gunhtang Gam Shawng yan kaw nna mung, magam gun ladaw (60) ning hpring sai magam gun ni hpe kumhpa shagrau ya ai, dai hpang Salang Kaba Lama Gum Hpan kaw nna, magam gun ni a, gawng malai chyeju dum ga tsun ai. Rev. Lahpai Shing Rip kaw nna mung, magam gun ladaw (60) ning hpring sai ni hpe akyu hpyi ya ai lam galaw ai.
Magam gun ladaw (60) ning hpring sai ni gaw, Salang kaba Lama Gum Hpan, Du Kaba Zao” Bug’ Htan”, Du Kaba Sut Awng Myat, Du Kaba Hkamma Dau Hkawng, Du Kaba Lungpu Hkam Sa hte Du Kaba Marip Yaw ni yawng marai (6) re.
KIO masat ninghtoi hpawng hpe lai wa sai aten ni hta gaw, dap shawa mungshawa law law hte wu wu di di galaw ai raitim, ya aten na mungmasa hpyenmasa sat lawat a majaw, tinang na magam dap, makan dap htuk manu ai shara ni hta hpawng lamang ni hpe galaw ai lam chye lu ai.
