EEDY NEWS News and Development
KIA Masat (9) Dap Ba, Masat (6) Dap Dung ginra hta May shata 15 ya shani hta gumshen Myen hpyen ni hpe KIA, PDF hpawng hpawm hpung ni shara (4) kaw, bawm hte hkap shingla gasat ai lam chye lu ai.
Gumshen Myen Balik Dap Masat (30) hte Sam Hkyeng P.T.Ts pawng hpawm hpyen hpung ni gaw, Seng Tawng Hpri Mahkrai kaw na rawt wa ai modo (1) hpe KIA hte PDF pawng hpawm hpung ni bawm hte hkap shingla gasat ai lam nga ai.
Dai hpang shana daw hkying 2:00pm aten hta Lung Sai Bum maga na rawt wa ai gumshem Myen hpyen Balik hte P.T.Ts pawng hpawm hpung ni modo (1) hte rawt wa ai hpe KIA ni bawm hte hkap shingla gasat ai hta modo gaw, hkaraw de galau agrawp mat ai lam, shawnglam shiga lawk kaw na chye lu ai.
Shwe Myanmar Sau Seng makau Happy KTV kawn rawt wa ai gumshem Myen hpyen dap Hk.L.Y (76) dap na n-gun (15) daram lawm ai modo 3 hpe KIA ni bawm hte hkap shingla gasat ai hta gumshem Myen hpyen maga na hkra hkala ai lam, ginra masha ni kaw na chye lu ai.
Gumshem Myen hpyen dap Hk.L.Y (13) dap hte Myen Balik Masat (28) dap pawng hpawm n-gun (10) gaw,Awng Ta Ya Lam Mazup kaw na modo hte rawt wa ai ten hta KIA ni bawm hte gap gasat ai kawn modo hten agrawp ai lam nga ai.
Seng Ra mare nnan lam mazup kaw modo (2) hte du nga ai gumshem Myen hpyen Hk.L.Y (76) hte Hk.L.Y (13) dap pawng hpawm hpyen hpung ni sinat gap taw ai hpe KIA ni bawm 2 lang sa gap bun ai lam chye lu ai.
