EEDY NEWS News and Development
KIA Masat (3) Dap Ba, Masat (1) Dap Dung ginra hta February shata praw 7 ya shani hkying 3:35pm aten laman Man Je Hpan Hka kawng kaw dap jung nga ai gumshen Myen balik gate hpe KIA hte PDF pawng hpawm hpung ni sa gap ai kawn, gasat majan byin ai lam chye lu ai.
Gasat majan byin ai shaloi Hk.L.Y (47) dap ni kaw nna, 60mm hte hkrup mara gap ai majaw, Hpan Hka kawng na Slg. Lahtaw Zau Yaw (Asak-53) a sinda kaw pala hkra hkala ai lam chye lu ai.
KIA Masat (27) Dap Dung ginra hta mung, Bang Gaw mare hte Jan Mai Kawng Ra kawn lagaw lam hte pru wa ai Hk.M.Y (424), Hk.L.Y (223) dap na pawng hpawm tai n-gun (100), Baduza langai lawm ai hpung ni hpe February shata praw 6 ya shani hkying 3:42pm aten hta KIA hpyen hpung ni Na Hkawng bum lawu, Hkrai Nga kawng mayan hta hkap gap ai lam nga ai.
Masat (10) Dap Ba, Masat (17) Dap Dung ginra ni hta mung, February shata praw 7 ya shani hkyin 9:30am hte 11:10am aten laman Mung Yaw sinpraw, Loi Jak bum pawt, Lung Byit mare kaw dap jung nga ai Tatma (99) kata na gumshem Myen hpyen hpung ni hte MNDAA hpyen hpung ni gasat poi byin ai hta gumshem Myen hpyen ni Jet nbungli hte (2) lang wa gap ai lam na chye lu ai.
Dung (12) ginra hta mung February shata praw 6 ya shana, Shwi Gu, Myen balik dap hpe KIA hte PDF pawm hpawm hpyen hpung ni sa gap ai hta, gasat gala byin nga ai ten Hk.L.Y (56), Hk.M.Y (602) dap hte balik dap kawn, laknak gaba n htang gap bun ai lam chye lu ai.
Masat (2) Dap Ba ginra rai nga ai Nam Gawn ja maw kaw shara la nga ai Hk.L.Y (318) dap hpe KIA hpyen hpung ni February praw 6 ya shani sa htim gap ai lam nga ai rai nna, Masat (8) Dap Ba, hpyen hpung ni nga ai Kata ginra hta mung, Nam Tsan mare baw de February shata praw 5 ya shani Hk.M.Y (415) dap na hpyen n gun (80) daram gale pru wa ai majaw gasat gala majan byin ai lam chye lu ai.
