EEDY NEWS News and Development
KIA Masat (2) Dap Ba, Masat (14) Dap Dung ginra, Nambru mare Namgawn kaw February shata praw 6 ya jahpawt hkyi 10:00am aten daram hta gumshem Myen hpyen dap hte KIA ni gasat gala majan byin ai lam chye lu ai.
Nambru mare Namgawn gumshem Myen hpyen Hk.M.Y (390) dap hpe KIA hpyen hpung ni sa htim gap ai kawn gasat poi byin ai re lam, ginra shiga lawk kaw na chye lu ai.
February shata praw 5 ya shani hta mung, KIA Masat (9) Dap Ba, Masat (44) Dap Dung ginra, Senghpra mare shingdu Manaw Maw mare makau Maisak sun kawng kaw, gumshem Myen hpyen dap Hk.M.Y (111) dap na hpyen hpung ni hte KIA hpyen hpung ni gasat poi byin ai, ndai ginra hta February shata praw 3 ya shani kaw nna gasat poi byin ai re.
Gasat gala majan byin ai hta gumshem Myen hpyen ni gaw, hpyen gasat nbungli jai lang nhtawm mungshawa nga ai kaw bawm ni jahkrat bun ai majaw, dum nta hten za hkrum ai sha n-ga mungmasha ni si hkala hkrum ai lam ni byin ai hpe mung chye lu ai.
KIA Masat (1) Dap Ba, Masat (22) Dap Nawng Dap Dung ginra, Daru Hka mahkrai kaw nga ai, Hk.L.Y (37) dap ni gaw, Daru mare hte grup yin hkan na mare salang ni hpe hpyen dap de shaga la nna, KIA ni ya na zawn sa gap ai gaw nanhte ni anhte hpe shiga n jaw la ai majaw re. Ya na dai zawn bai byin jang mare de sinat gap bang ya na ngu tsun ai lam, ginra shisawk ni kaw na chye lu ai.
