KIA Dap Dung (8) ginra hta gumshem Myen hpyen ni hte KIA ni gasat gala majan byin

Mungmyit Sinli Ga (Kachin Sub-state), KIA Masat (4) Dap Ba, Masat (8) Dap Dung ginra, Man Lung Mare lam numshe kaw, May shata 12 ya shana maga hkying 4:40pm aten hta gumshem Myen hpyen dap, Dapnu (99) ni hte KIA hpyen hpung ni gasat gala majan byin ai lam, buga masha ni kaw na chye lu ai.

“KIA ni hkap nga ai kaw Myen Dapnu, (Tatma 99) na n gun 100 jan re ai hpyen hpung ni shamu shamawt lung wa ai majaw, gasat poi byin ai re” nga nna buga masha langai tsun ai.

Gasat gala majan byin ai shara de, Kutkai kaw dap jung ai gumshem Myen hpyen ni mung, laknak kaba 120mm hte 10 jan lang gap bun ai lam chye lu ai.

Gumshem Myen hpyen ni htingnut mat ai lam sha nnga yang gaw, gasat gala majan matut nna naw byin wa na re, dai na de gasat poi byin ai shara hte kade ntsan ai kaw lahkawng maga naw maja hkat nga ma ai, nga nna ginra masha ni tsun ai kaw na chye lu ai.

Ya aten gumshem Myen hpyen dap ni, Jinghpaw Mung, Mungmyit Sinli Ga (Kachin Sub-state), Karen Mung, Hkang Mung hte Sagaing ginra ni de, laknak n gun, hpyen n gun hte malu masha ni ding yang ngu na htaw shalai bang nga ai lam, ginra shiga lawk ni kaw na chye lu ai.