KIA Masat (3) Dap Ba ginra hta gasat gala majan byin

KIA Masat (3) Dap Ba ginra hta shamu shamawt du nga ai, gumshem Myen hpyen n gun (40) daram hta KIA ni, February shata praw 5 ya jahpawt hkying 9:00am aten kaw nna, hkying 9:45am aten laman, Hka Kan mare baw kaw gasat gala majan byin ai lam chye lu ai.

Gumshem Myen hpyen dap, Hk.L.Y (47), Hk.M.Y (319) hte Hk.M.Y (601) dap na pawng hpawm hpyen n gun (80) daram gaw, Hka Kan mare baw mayan hta, lam galaw na matu du nga ai ni hpe shimlam la ya na matu yu wa ai gumshem Myen hpyen hpung hpe KIA ni bawm hte shawng hkap kapaw bun ai hpang gasat poi bai byin ai re lam, shawng lam shi sawk ni kaw na chye lu ai.

KIA Masat 8 Dap Ba ginra, Nam Ma Bum mayan hta mung, February shata praw 4 ya shana yup tung 12:45am aten hta gumshem Myen hpyen ni, Jet Fighter (2) hte bawm lahkawng lang wa jahkrat bun ai dai hpang hkying 12:50am aten hta Nawng Pung Gau Gwi hka hku de, Jet lahkawng hte bai wa jahkrat bun ai lam nga ai re.

February shata praw 3 ya shani hta mung, KIA Masat 8 Dap Ba ginra, Shwi Gu maga na Tin Baw In mare maga de shamu shamawt shang wa ai gumshem Myen hpyen dap, Hk.M.Y (602) dap na hpyen n gun (40) jan hte Myu Laq KPDF hpyen hpung ni gasat poi byin ai lam chye lu ai.