KIA Masat (6) Dap Dung ginra, Kasen Bum mayan hta gumshem Myen hpyen ni nbungli bawm wa jahkrat

KIA Masat (9) Dap Ba, Masat (6) Dap Dung ginra, Kasen Bum mayan kaw August shata praw 8 ya shani hta gumshem Myen hpyen ni Jet nbungli hte bawm wa jahkrat bun ai lam chye lu ai.

Dai shara de sha, Hpakant Byuha Kawng kaw nna mung, laknak kaba 3 lang gap bun ai lam nga ai. Dai na hkying 8:30pm aten daram hta mung Kasen Bum mayan hta sinat kaji kaba grai ngoi ai lam, ginra masha ni tsun ai kaw na chye lu ai.

Kasen Bum kaw dap jung shara jahkrat nga ai gumshem Myen hpyen dap, Dapnu 33 kata na Hk.M.Y (119) dap hte Sezin kaw shara jahkrat nga ai SNA dap shara lahkawng hpe August shata praw 7 ya shani hta KIA, K-PDF pawng hpawm hpyen hpung ni sa htim gap gasat zing kau ai re.

Mandalay maga na lung wa ai gumshem Myen hpyen, sanghpaw li nkau Shwegu kaw du shang nna, dai makau grup yin mare hkan na mungmasha marai (30) daram hpe rim woi nhtawm, August shata praw 8 ya shani Manmaw maga de matut lai lung wa sai lam, buga masha ni kaw na chye lu ai.

Ndai sanghpawli gaw lai wa sai July shata 26 ya shani Mandalay kaw nna lung wa ai gumshem Myen hpyen dap a hpyen n-gun, laknak arung arai htaw, malu masha htaw lung wa ai re hpe mung chye lu ai.