EEDY NEWS News and Development
Ginjaw COVID-19 Ana Zinli Makawp Ninghkap Komiti kawn lockdown masat da ai Laiza Muklum kata na mungshawa ni hpe November shata praw (9) ya shani kaw nna malu masha garum jaw nga ai lam chye lu ai.
Garum jaw ai malu masha ni gaw, sau, shakau, gala shapre, jum, majap, shanam hte yang yi, nga chyahkraw ni rai nna, Laiza Muklum kata na mungshawa htinggaw shagu hte Woi Chyai hpyen yen dabang, Je Yang hpyen yen dabang, Hpun Lum Yang hpyen yen dabang hte Sut Mu Awng hpyen yen dabang ni de garum jaw sa wa na re lam chye lu ai.
“Myit kaji garen rai nna, pru hkawm sa yak hkak hkrum nga ai ten malu masha garum jaw ai majaw, kabu chyeju dum ai lam, nmyit mada ai a kajawng sha ana zinli kap bra ai masha grau law jat wa ai majaw, lawk (1) ni gaw kadai mung kade dum nta kaw lockdown galaw nhtawm tsi gawn lajang hkamla nga ai lam, Laiza Muklum lawk (1) kaw na amyu shayi ningbaw Hpawmi Kumraw Roi Seng tsun dan ai.
Ya aten Muklum kata ana kap hkrum nna tsi gawn lajang hkamla nga ai ana positive masha yawng marai 1500 jan du nga sai rai nna, matut nna positive byin ai dum nta ni hpe ana da bat jep chyoi ya nga ai re.
Laiza Muklum kata COVID-19 ana zinli grau nna kap bra sawng wa ai majaw, lai wa sai November shata praw (2) ya shani kaw nna Laiza Muklum hpe lockdown masat nhtawm, ana jep chyoi ai lam hte ana kap hkrum ai machyi masha ni hpe tsi gawn lajang ai lam dingyang galaw nga ai re hpe chye lu ai.
