Manwin Gyi gumshem Myen hpyen dap hpe KIA ni gasat zing madu la

KIA Masat (3) Dap Ba, Masat (27) Dap Dung ginra, Ulang Pa Ginwang Manwin Gyi, Hk.M.Y (424) gumshem Myen hpyen dap hpe KIA pawng hpawm hpyen hpung ni gasat zing madu la lu ai lam chye lu ai.

January shata 21 ya jahpawt hkying 8:00am aten daram kaw nna, KIA pawng hpawm hpyen hpung ni htim gasat ai hta hkying 10:00am aten daram hta gasat zing madu la lu sai lam, ginra masha langai tsun ai.

Majan byin ai majaw gumshem Myen hpyen dap nbungli hte bawm wa jahkrat bun ai hta majan byin ai shara de nre ai sha, Manwin Gyi mare kata de hkrat kapaw ai hta mungshawa ni hkala hkrum ai hte dum nta ni hten za mat ai lam chye lu ai.

Dai ni January shata 21 ya shani hta sha, Sammung Dingdung daw, Mungmyit Byuha kata na Hk.L.Y (276) Mabing Kung Mahkan gumshem Myen hpyen dap hte Myoma Balik Dap hpe, KIA, ABSDF, AA hte PDF pawng hpawm hpyen hpung ni padang dip zing gasat la lu ai lam chye lu ai.

Ya aten gumshem Myen hpyen dap hte KIA ni hpyen masa shaja hkat nga dingyang rai nna, gasat gala majan mung matut manoi byin wa mai ai lam chye lu ai.