Mazut roi rip sat kau hkrum ai KBC Sasana Sara num yan 9 ning ladu hkrup sai

Gumshem Myen hpyen dap ni a lata hta mazut roi rip sat kau hkrum ai, KBC laili laika sasana saranum yan, asak ap nawng mat wa ai 9 ning hpring sai re.

Saranum Maran Lu Ra hte Saranum Tangbau Hkawn Nan Tsin yan gaw, lai wa sai 2015 ning January shata 19 ya shana, Mungmau Ginwang, Kawnghka mare hta gumshem Myen hpyen dap ni a lata hta mazut roi rip sat kau hkrum ai rai nna, dai ni January shata 19 ya shani 9 ning ladu hkrum sai re.

Saranum yan a myit dum akyu hpyi hpawng hpe KBC Ginjaw kaw nna woi awn galaw ai hta 2022 ning (7) ning ladu hkrum du hkra, shaning shagu galaw lai wa sai raitim, 2023 ning kaw na gaw lam amyu myu, masa amyu myu a majaw nlu galaw mat ai re lam chye lu ai.

Sasana saranum yan mazut roi rip sat kau hkrum ai manghkang hte seng nna, dai ni du hkra teng man ai mahtai kaja nlu shi ai raitim, teng man ai mahtai kaja lu hkra, lit nga ai salang ni hku nna, matut shakut nga ding yang re lam chye lu ai.

Saranum yan mazut roi rip hkrum ai ten hta Kawnghka mare makau kaw dap jung shara jahkrat nga ai, gumshem Myen hpyen dap gaw Hk.M.Y (503) dap ni re lam chye lu ai.