Pat shing dang da hkrum ai hpyen yen Mungshawa marai ( 129 ) tup hpe sa woi la lu

KIA Dap Ba ( 9 ) Dap Dung ( 6 ) ginra, Lai Nawng Hku kaw majan a majaw pat da hkrum ai Mungshawa marai ( 129 ) tup hpe May praw, 7 ya jahpawt hkying 8:30am aten hta Lai Nawng Hku kawn Jakli ( 7 ), Modo ( 7 ) hte wa woi la nna shana daw hkying 2:45pm aten hta gaw Chong Wa kaw du nga sai rai nna Hu Pin lam hku nna Ka- Maing de matut lai yu wa na re lam chye lu ai.

Lai Nawng Hku mare kaw n kam wa nna ngam nga ai Mungshawa ni ( 5 ) gaw Slg. Kyaw Lin hte madu jan Pahkawng Roi, Slg. Njawn Gam Awng hte madujan Nkrawp Ja Hpa Lu kasha asak ( 2 ) ning re kasha La ni re lam na chye lu ai.

Pat shing dang da hkrum ai hpyen yen Mungshawa ni hpe Asuya kawn ya na zawn shim lum ai shara de woi pru wa sai majaw Myitkyina Muklum kaw Wunpawng Ramma ni kawn lam hkawm n-gun madun lamang hpe gan jahkring da na re lam lit hkam langai tsun ai kawn chye lu ai.

KIA Dap Ba ( 2 ) ginra, Hka Mau Hka Zup makau kaw mung May praw, 7 ya jahpawt hkying 7:45am aten hta Myen hpyen hpung ni hte KIA hpyen hpung ni gasat majan byin ai lam shawng lam shi sawk ni kawn chye lu ai.