Shwe Min, Pyi Tu Tsit hpyen hpung ni, Ga Ra Yang mare kaw gaduk htu nna shara la nga

Manmaw, Myitkyina lam Ga Ra Yang mare hta October shata 23 ya shani kaw nna, Shwe Min (P.T.Ts) hpyen hpung n-gun (30) daram gaw, mare kata kaw gaduk htu nhtawm shara la nga ai lam, ginra masha ni tsun ai kaw na chye lu ai.

Laknak lang ai hpyen ni mare kata kaw nnga ya na matu, Hkatsu Myen hpyen dap ni hpe Ga Ra Yang mare salang ni tsun jahkrup da ai lam nga sai raitim, Shwe Min (P.T.Ts) hpyen hpung ni gaw, ya na zawn mare kata kaw gaduk htu nna, shara la wa ai majaw, mungshawa ni majan byin wa na hpe hkrit tsang nga ai lam, buga masha ni tsun ai.

Shawoi gaw gaduk htu hkra nnga ai raitim, ndai lang gaw gaduk htu nna, shara la taw nga ai re hte gumshem Myen hpyen dap ni Nam San Yang hpyen man de shamu shamawt sa wa na rai yang, Shwe Min (P.T.Ts) ni gaw shimlam la ya ai hpe galaw nga ai re.

Ndai Shwe Min (P.T.Ts) ni gaw Hkatsu gumshem Myen hpyen dap a matsun npu kaw nga ai rai nna, lai sai aten hta mung, mare kata kaw shara la nga ai hpe sa tsun yang, lana mi sha gan yen nna hpang jahpawt yawng mare kata de bai wa shang nga ai lam chye lu ai.

Ya aten KIA Masat (1) Dap Nawng Daju ginra, Mali Ja Pu hpyen man maga de, gumshem Myen hpyen dap ni hte KIA ni hpyen masa shaja hkat nga ding yang re lam matut chye lu ai.