Gumshem Myen hpyen dap hte KIA ni gasat gala majan byin
KIA Masat (9) Dap Ba, Masat (44) Dap Dung ginra, Chyau Htu mare kaw August shata 22 ya shani, gumshem Myen hpyen dap hte KIA ni gasat gala majan byin ai lam chye lu ai.
Nam Ya kaw dap jung nga ai gumshem Myen hpyen dap ni, gasat poi byin ai shara hte KIA ni nga ai shara maga de laknak kaba nhkring nsa hkrup mara gap shadam bun ai majaw, Nam Ya mare kaw wa hkrat ai hta asak 35 ning re ai Hpawmi Zin Mar Oo hkala hkrum ai lam, ginra masha ni kaw na chye lu ai.
August shata 21 ya shani hta mung, Ma-U Pin mare kaw, gumshem Myen hpyen ni hpyen shamu shamawt du shang wa ai majaw, mungshawa hkrit tsang nna, Loi Seng KBC Nawku jawng hta marai (160) jan daram, hprawng koi yen nga ai lam, ginra shiga lawk kaw na chye lu ai.
Matut nna Mungmyit Sinli Ga (Kachin Sub-State), KIA Masat (4) Dap Ba, Masat (8) Dap Dung ginra hta mung, August shata 21 ya shani, Kutkai Byuha kaw nna gumshem Myen hpyen dap ni Loi Kang makau grup yin de laknak kaba 3 lang gap bun ai lam chye lu ai.
Dai hpang နွင္းဆီကုန္း kaw dap jung nga ai gumshem Myen hpyen dap Hk.L.Y (241) dap ni Maw Hik hte Man Htan lapran, Marau Kawng maga de laknak kaba matut, gap bun ai lam nga ai.
Ya aten KIA ni dap jung nga ai shara nkau ni hta gumshem Myen hpyen dap ni hpyen shamu shamat nga ai majaw, majan matut byin wa mai ai hte mungshawa ni hkawm sa hkawm wa ai lam hta shadi maja nga na lam, lit nga ai salang ni tsun da ai kaw na chye lu ai.
