Manmaw de lung wa ai sanghpaw hpung ni hpe KIA pawng hpawm hpyen hpung ni hkap gap shingla gasat
KIA Masat (11) Dap Ba, Shwegu ginra kaw na Manmaw de lung wa ai gumshem Myen hpyen dap sanghpaw hpung ni hpe KIA pawng hpawm hpyen hpung ni hkap gap shingla gasat nga ai lam chye lu ai.
September shata praw 2 ya jahpawt hkying 6:00am aten daram kaw nna, Shwegu kaw du shatup nga sai gumshem Myen hpyen dap sanghpaw hpung ni, Manmaw de lung wa ai kaw Zinbung grup yin, KIA pawng hpawm hpyen hpung ni hkap shingla gap gasat dat ai lam, shawnglam lit nga ai salang ni tsun ai.
Sanghpaw hpung ni hpe hkap shingla gap gasat dat ai hta sanghpaw kaji (2) hte sanghpaw kaba (1) hpe gap jahten kau ya lu ai rai nna, ngam nga ai sanghpaw nkau, Mali hka lahta de bai matut lung wa nga ai re lam chye lu ai.
KIA pawng hpawm hpyen hpung ni hkap shingla gap gasat nga ai hta hkying 9:00am aten daram du hkra rai yang, MDY kaw na rawt ai gumshem Myen hpyen dap nbungli hte bawm (9) lang wa gap gasat sai re lam chye lu ai.
Gumshem Myen hpyen dap ni gaw, laiwa sai August shata htum wa maga kawn, hka lam hku n-gun dat bai htu shadut lung wa nga ai rai nna, KIA pawng hpawm hpyen hpung ni mung, hkap shingla gap gasat nga ai hta sanghpaw nkau hpe gap jahten kau ya lu sai hte ya aten, Shwegu ginra Mali hka kau ding yang shani shagu gasat gala majan laja lana matut byin nga ai re lam chye lu ai.
