Manmaw de lung wa na hka sanghpaw hpung ni hpe shimlam la ya ai gumshem Myen hpyen ni hte KIA pawng hpawm ni laja lana gasat poi byin
Shwegu Muklum kaw du nga ai, hka sanghpaw hpung ni Manmaw de lung na matu, shimlam la ya ai gumshem Myen hpyen hpung hte KIA pawng hpawm hpyen hpung ni, August shata 29 ya shani Shwegu lahta Zinbung kaw laja lana gasat poi byin ai lam chye lu ai.
August shata 28 ya shana hta Shwegu hka hkingau kaw shakap jahkring da ai sanghpaw hpe KIA pawng hpawm hpyen hpung ni, FPV suicide drone, laknak kaba ni hte gap gasat ai majaw, sanghpaw langai wan hkru taw ai lam, ginra masha ni tsun ai kaw na chye lu ai.
KIA pawng hpawm hpyen hpung ni nga na shadu ai mare kahtawng ni de, Shwegu kaw dap jung nga ai Hk.L.Y (56) dap kaw nna laknak kaba hte hkrup mara gap shadam bun ai sha n-ga, mungkan kaw na pat hkum da ai cluster bomb du hkra jai lang gasat wa ai lam, shawng lam na lit nga ai salang ni tsun ai.
Gumshem Myen hpyen maga sum machyi hkrum ai lam law ai majaw, August shata 28 ya shana hkying yup tung 11:00pm aten daram hta Han Htet mare ningnan hte Han Htet mare kaw, Jet nbungli bawm 2 wa jahkrat gasat ai lam, ginra masha ni kaw na chye lu ai.
Hka sanghpaw hte lung wa ai gumshem Myen hpyen ni mung, Mali Hka mayan hkan na mare kahtawng ni de, sinat kaji kaba hte hkrup mara gap dumbre bun ai sha n-ga, nbungli kaw nna mung nhkring nsa bawm jahkrat gasat ai majaw, mungshawa dum nta ni law law hten za hkrum nga ai lam chye lu ai.
