Ginjaw ginra, Madi Yang makau hte KIA Masat (12) Dap Dung ginra hta gasat gala majan byin
KIO ginjaw ginra, Nam San Yang hpyen man, Madi Yang mare makau kaw, August shata 26 ya jahpawt, hkying 9:00am aten daram hta gumshem Myen hpyen dap hte KIA ni gasat gala majan laja lana byin ai lam chye lu ai.
Lai Lum Awng Ja kaw dap jung shara jahkrat nga ai gumshem Myen hpyen dap hte Hkaya Bum kaw nga ai Myen hpyen dap ni, KIA ni nga ai maga de laknak kaba hte hkrup mara gap bun ai lam nga ai rai nna, KIA ni mung Myen hpyen dap ni nga ai maga de, laknak kaba hte bai nhtang gap bun ai lam, shawng lam na lit nga ai salang ni tsun ai.
August shata 25 ya shani hta mung, Myitkyina maga de na gumshem Myen hpyen n-gun 100 daram gaw, Tungfung modo lahkawng hta jawn n htawm, nkau mi lagaw lam hkawm nna, Ga Ra Yang maga de shamu shamawt sa wa sai lam, ginra masha ni kaw na chye lu ai.
KIA Masat (3) Dap Ba, Masat (12) Dap Dung ginra hta mung, August shata 25 ya shana maga, hkying 5:40pm aten daram hta Si Bing kaw dap jung shara jahkrat nga ai, gumshem Myen hpyen Hk.L.Y (276) dap ni hpe KIA ni sa htim gap gasat ai lam nga ai re.
Dai gasat poi hta gumshem Myen hpyen ni kaw nna, hpyen lang arung arai hte machyu pala nkau hpe KIA ni padang dip zing la lu ai lam, shawng lam shiga lawk kaw na chye lu ai.
Ya aten hta ginjaw ginra de gumshem Myen hpyen dap ni, hka lam hte kawng lam hku nna, hpyen n-gun law law hte htu shadut shamu shamawt sa wa ding yang re majaw, gasat gala majan matut nna, naw laja wa na masa nga ai lam shawng lam na lit nga ai salang ni tsun ai kaw na chye lu ai.
