Nam San Yang hte Madi Yang mayan kaw gumshem Myen hpyen ni Jet Fighter nbungli hte bawm wa jahkrat
Myitkyina kaw na lung wa ai gumshem Myen hpyen dap ni gaw, Madi Yang hpyen man maga de Jet Fighter 2 hte Rocket bawm 6 lang wa jahkrat bun nna, dai hpang hkying 5:20pm aten hta mung Nam San Yang maga de Jet Fighter 2 hte Rocket bawm 4 lang bai wa jahkrat bun ai lam, lit nga ai salang ni kaw na chye lu ai.
Dai shani sha Manmaw kaw na yu wa ai gumshem Myen hpyen dap ni a Sanghpaw 9 hpung ni hpe KIA ni Zin Bung mare kaw, hkap gap dat ai lam chye lu ai.
Matut nna, Mungmyit Sinli Ga (Kachin Sub-State), KIA Masat (4) Dap Ba, Masat (8) Dap Dung ginra hta mung, August shata 26 ya shani Kutkai Byuha kawn, Sinli maga yu wa ai Tatma (99) kata na gumshem Myen hpyen la hte arung arai htaw hpyen modo (25) hpe KIA ni Nga Rem Dabang lawu hpunggaw kaw, Bawm hkap gap bun ai lam chye lu ai.
August shata 25 ya shani hta mung, KIA Masat (9) Dap Ba, Masat (44) Dap Dung ginra hta Nam Ya kaw dap jung nga ai gumshem Myen hpyen dap Hk.M.Y (120) dap ni, Hkum Tsai mare maga de laknak kaba 8 lang gap bun ai lam, buga masha ni tsun ai kaw na chye lu ai.
