Gumshem Myen hpyen dap hpe KIA ni laknak kaba hte hkap gasat
KIA Masat (3) Dap Ba, Masat (12) Dap Dung ginra hta August shata 27 ya shani hkying 1:10pm aten, Shwegu kaw nna yu wa ai gumshem Myen hpyen a Sanghpaw hpe KIA hte PDF pawng hpawm hpung ni, Galung Zinlawng kaw laknak kaba hte hkap gap ai lam chye lu ai.
Manmaw kaw nna bai nhtang yu wa ai Sanghpaw (9) hta na langai hpe KIA hte PDF pawng hpawm hpye hpung ni laknak kaba hte hkap gap bun ai re.
Dai hpang Ban Bwi Kung mare makau kaw du nga ai, gumshem Myen hpyen dap Hk.L.Y (77,121) dap na pawng hpawm hpung hte KIA ni, shana daw hkying 3:00pm aten hta gasat gala majan byin ai lam chye lu ai.
Dai shani hta sha, gumshem Myen hpyen dap Hk.L.Y (236) dap ni kaw nna mung, Mali hka Sinna HKran Ngapyaw Taw maga de laknak kaba 10 lang gap shadam bun ai lam chye lu ai.
Matut nna KIA Masat (6) Dap Ba, Masat (36) Dap Dung ginra hta mung, August shata 27 ya shani, 105 Mile kaw nna lagaw lam hku lung wa ai Ts.K.Hk (17) kata na gumshem Myen hpyen dap hte Lung Htang P.T.Ts lawm ai n-gun 50 daram hpung ni hpe KIA ni, Nam Tau mare hte Hpa Hpik mare lapran kaw, remote bawm hkap adem bun ai lam, shawng lam shisawk ni kaw na chye lu ai.
