SNA hpyen dap langai hpe KIA pawng hpawm hpyen hpung ni gasat zing
Indaw ginra kata dap jung nga ai, SNA hpyen dap langai hpe KIA pawng hpawm hpyen hpung ni gasat zing madu la lu ai lam chye lu ai.
July shata 17 ya shani, Indaw ginra လုံးတုံ mare makau kaw dap jung shara la nga ai, Sam Hkyeng (SNA) P.T.Ts hpyen dap post langai hpe KIA pawng hpawm hpyen hpung ni gasat zing madu la lu ai lam, shawnglam lit nga ai salang ni tsun ai.
July shata 15 ya shani kaw nna gasat gala majan laja lana byin nga ai hta dai ni gasat zing madu la lu sai rai nna, SNA maga si hkala law ai hte laknak machyu pala arung arai ni hpe mung, gasat zing madu la lu ai re lam chye lu ai.
Shwegu hte Hkawng Lam Hpu ginra ni hta mung, KIA pawng hpawm hpyen hpung ni hte gumshem Myen hpyen dap ni shani shagu ngu na gasat gala majan byin nga ai rai nna, lahkawng maga hpyen masa matut shaja hkat nga ding yang re ai lam chye lu ai.
