Hpakant ginra kata Myen hpyen dap ni nbungli hte wa gap gasat
KIA Masat (9) Dap Ba, Hpakant ginra de gumshem Myen hpyen dap ni nbungli hte wa gap gasat ai lam chye lu ai.
July shata 14 ya shani, Hpakant ginra de gasat gala majan byin ai lam nnga ai raitim, gumshem Myen hpyen dap ni Jet nbungli (2) hte bawm (3) lang wa gap gasat ai lam, ginra masha ni kaw na chye lu ai.
Shana maga hkying 2:50pm aten laman hta bawm lahkawng lang, hkying 3:00pm aten laman hta kalang wa gap gasat ai nna, rocket hte mung wa gap gasat ai re lam chye lu ai.
Bawm wa gap gasat ai hta mungshawa hkra hkala ai lam nnga ai raitim, dum nta htenza mat ai lam nga ai, ya aten Hpakant ginra hta gaw gasat gala majan byin ai lam nnga ai raitim, gumshem Myen hpyen dap maga hpyen shamu shamawt ai lam gaw, ding yang galaw nga ai hpe chye lu ai.
KIA Masat (11) Dap Ba, Masat (12) Dap Dung, Shwegu ginra hta mung, KIA pawng hpawm hpyen hpung ni hte gumshem Myen hpyen dap ni laknak kaji kaba, drone ni hte shani shagu ngu na gasat gala majan byin nga ai re lam, matut sagawn chye lu ai.
