Gumshem Myen hpyen dap ni Jet Fighter nbungli hte bawm jahkrat bun
KIA Masat (1) Dap Nawng Daju ginra, Sama lam numshe mayan kaw September shata praw 5 ya shana daw hkying 4:22pm aten daram hta Myitkyina maga de na sa wa ai, Jet Fighter nbungli 1 hte bawm wa jahkrat bun kau da ai lam, shawnglam shiga lawk kaw na chye lu ai.
Nbungli bawm wa jahkrat ai hpang, dai na de hkying 6:00pm aten daram kaw nna, gumshem Myen hpyen dap hte KIA ni laknak kaba gap bun hkat ai lam nga ai rai nna, Nam San Yang hpyen man hte Madi Yang hpyen man maga de mung, laknak kaba hte gap bun hkat ai lam matut chye lu ai.
Bumre, Hka Ya kaw dung ai gumshem myen hpyen dap ni mung, Laiza makau grupyin hte Madi Yang, Nam San Yang maga de laknak kaba hkrup mara gap shadam bun ai lam matut chye lu ai.
Manmaw maga de na lung wa ai gumshem Myen hpyen dap a, hpyen lang arung arai hte malu masha htaw ai modo (10) hpung ni hpe September shata praw 4 ya shana hkying 11:00pm aten daram hta, Da Seng mare makau kaw KIA ni bawm hte hkap gap gasat dat ai hta gumshem Myen hpyen maga si hkala law ai lam nga ai raitim, marai kade si hkala ai re hpe gaw, tup hkrak nchye lu shi ai lam, shawng lam na lit nga ai salang ni kaw na chye lu ai.
၎
င
၎
၎
